![](https://eacnews.asia/uploads/images/15822.jpg)
នាយករដ្ឋមន្ត្រីចូលរួមសោកស្ដាយចំពោះហេតុការណ៍បាញ់សម្លាប់មនុស្សជាង ៣០នាក់នៅប្រទេសថៃ កាលពីថ្ងៃព្រហស្បតិ៍
ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានចូលរួមរម្លែកទុក្ខនឹងចូលរួមសោកស្ដាយចំពោះការបាញ់ប្រហារសម្លាប់មនុស្ស ៣៤នាក់នៅមជ្ឈមណ្ឌលថែទាំមួយកន្លែង នៅខេត្តណងប៊ូឡាំភូ ភាគឦសានប្រទេសថៃ កាលពីថ្ងៃព្រហស្បតិ៍ម្សិលមិញ។
ក្នុងជំនួបរដ្ឋមន្រ្តីឧត្តមសិក្សា វិទ្យាសាស្ត្រស្រាវជ្រាវ និងនវានុវត្តន៍ប្រទេសថៃលោក អនេក ឡោថាំម៉ាថាត់ នៅវិមានសន្ដិភាពព្រឹកថ្ងៃសុក្រ ទី៧ ខែតុលានេះ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានលើកឡើងថា «រាជរដ្ឋាភិបាលកម្ពុជា ប្រជាជនកម្ពុជា សូមចូលរួមសំដែងនូវការសោកស្ដាយចំពោះការបាត់បង់នេះ»។
គួរឱ្យដឹងផងដែរថា កាលពីថ្ងៃព្រហស្បតិ៍ទី៦ ខែតុលា ម្សិលមិញ ជនដៃដល់ដែលធ្លាប់ជាអតីតនគរបាលថៃ ឈ្មោះ ផានយ៉ា ការ៉ាប់ អាយុ ៣៤ឆ្នាំ បានចូលទៅកាន់មណ្ឌលថៃទាំងកុមារមួយកន្លែង ក្នុងខេត្តណងប៊ូឡាំងភូ បាញ់រះទៅលើកុមារដែលកំពុងចូលមកទទួលទានអាហារថ្ងៃត្រង់តែម្ដង។
ក្រោយពីបាញ់ប្រហាររួចជនដៃដល់រូបនេះបានធ្វើដំណើរទៅបាញ់សម្លាប់ប្រពន្ធ និងកូន មុននឹងសម្លាប់ខ្លួនឯងតាមក្រោយ។
គេនៅមិនទាន់ដឹងមូលហេតុអ្វីទើបបណ្ដាលឱ្យជនដៃដល់រួបនេះប្រព្រឹតិ្តអំពើសាហាវបែបនេះនោះទេ គ្រាន់តែដឹងថាគឺត្រូវបានដេញចេញពីអង្គភាពកាលពីមួយឆ្នាំ១ ក្រោយពាក់ព័ន្ធនឹងការចែកចាយគ្រឿងញៀន និងកំពុងជាប់បណ្ដឹងនៅតុលាការ៕